Вядомая швэдзкая экалягічная актывістка Грэта Тунбэрг з паплечнікамі з Сыцыліі дабралася на яхце «Мадлен» да тэрытарыяльных водаў, якія кантралюе войска Ізраілю. Там судна спынілі і зайшлі на яго борт ізраільскія вайскоўцы.
Прапалестынскія актывісты распаўсюдзілі інфармацыю пра тое, што гуманітарную дапамогу, якую яны везьлі ў Газу, сканфіскавалі. Паводле іх, на яхце былі мэдыкамэнты, дзіцячыя малочныя сумесі і іншыя рэчы, якія павінны ісьці на дапамогу жыхарам Газы.
Раней кіраўнік міністэрства абароны Ізраэль Кац папярэджваў, што войска не дазволіць яхце з 12 актывістамі на борце дасягнуў берагу Газы. У сваю чаргу, Міністэрства замежных спраў Ізраілю напісала, што ўсім 12 пасажырам яхты далі ежу і ваду, а «шоў скончанае». Само судна там назвалі «сэлфі-яхтай». Гэтае ж ведамства сказала, што верне ўсіх пасажыраў яхты ў іхныя краіны, а гуманітарную дапамогу, якая была на борце, даставіць у Газу.
Кац падкрэсьліў, што блякада Газы скіраваная на перадухіленьне паставак зброі для ХАМАС — радыкальнай палестынскай групоўкі, прызнанай у ЗША і ЭЗ тэрарыстычнай арганізацыяй.
Місію арганізавала «Кааліцыя флятыліі свабоды», якая ўжо 15 гадоў спрабуе трапіць у Газу морам — праз тэрытарыяльныя воды, якія кантралюе Ізраіль.
Міністэрства замежных спраў Турэччыны скрытыкавала дзеяньні ізраільскіх уладаў, называючы гэта «парушэньнем законаў і пагрозай бясьпецы міжнароднага мараплаўства».
ГЛЯДЗІЦЕ ТАКСАМА: Ізраіль заявіў, што ня дасьць караблю з Грэтай Тунбэрг даплыць да Газы ГЛЯДЗІЦЕ ТАКСАМА: Ізраіль аб’явіў аб пачатку прызыву дзясяткаў тысяч рэзэрвістаў у Газу