Кіраўнік Ровенскай абласной вайсковай адміністрацыі Аляксандар Коваль заявіў аб «магутным паветраным удары» Расеі па рэгіёне, у выніку якога адзін чалавек атрымаў раненьні.
«Вельмі цяжкая ноч для Ровеншчыны... Велічэзная ўдзячнасьць за прафэсіяналізм нашым сілам СПА, якія зьнішчылі вялікую колькасьць варожых цэляў. На месцы працуюць прадстаўнікі сілаў абароны і іншых службаў», — паведаміў Аляксандар Коваль у сваім Telegram-канале.
У Кіеве ў выніку расейскага абстрэлу пашкоджаны офіс. Улады пакуль не паведамляюць, ці ёсьць пацярпелыя.
Расейскія войскі не спыняюць удары па Харкаве. У ноч на 9 чэрвеня горад зноў абстралялі кіраванымі авіябомбамі.
У Польшчы ўначы СПА пераводзілі ў баявую гатоўнасьць
У Польшчы праз расейскую атаку для гарантаваньня бясьпекі краіны падымалі ў паветра баявую авіяцыю.
«Дзяжурныя пары зьнішчальнікаў паднялі ў паветра, а наземныя службы супрацьпаветранай абароны і радыёлякацыйнай выведкі былі пераведзеныя ў найвышэйшы стан гатоўнасьці. Гэтыя дзеяньні маюць прэвэнтыўны характар і выкарыстоўваюцца ў мэтах бясьпекі і маніторынгу сытуацыі ў непасрэднай блізкасьці ад мяжы Польшчы», — паведамілі ў Апэратыўным камандаваньні Ўзброеных сілаў Польшчы.
Пазьней удакладнілі, што парушэньня паветранай прасторы Польшчы не зафіксавана.
Украінскія дроны даляцелі да Чувашыі і Ніжагародзкай вобласьці
Кіраўнік Чувашыі Алег Нікалаеў заявіў аб удары дронамі па прадпрыемстве «ВНИИР-ПРОГРЕСС», якое вырабляе электроніку для расейскай арміі.
«Два БПЛА ўпалі на тэрыторыі „ВНИИР“, праз што ўхвалілі адказнае рашэньне аб часовым прыпыненьні вытворчасьці для гарантаваньня бясьпекі супрацоўнікаў. Яшчэ па адным бесьпілётніку ўпалі ў палях Чэбаксарскай і Краснаармейскай муніцыпальных акругаў. Пагрозы для людзей няма», — заявіў кіраўнік рэгіёну.
Паводле яго, пацярпелых таксама няма.
У Генэральным штабе Ўзброеных сілаў Украіны пацьвердзілі ўдар па вайсковым прадпрыемстве ў Чэбаксарах.
«Гэта аб’ект вайскова-прамысловага комплексу Расеі, вытворца навігацыйнага абсталяваньня, якое забясьпечвае вытворчасьць адаптыўных антэнаў „Камэта“, што выкарыстоўваюцца, у тым ліку, ва ўдарных БПЛА тыпу „Шахед“, уніфікаваных модулях плянаваньня і карэкцыі (УМПК) для кіраваных авіябомбаў (КАБ), ды ў іншым высокадакладным узбраеньні», — адзначаецца ў паведамленьні ўкраінскага Генэральнага штабу.
Паводле зьвестак украінскага боку, сама меней два бесьпілётнікі пацэлілі ў прадпрыемства, у выніку чаго пачаўся маштабны пажар.
«Удары па аб’ектах, якія забясьпечваюць узброеную агрэсію Расейскай Фэдэрацыі, будуць працягвацца да поўнага яе спыненьня», — заявілі ў Генэральным штабе.
Пазьней у Генштабе Ўкраіны паведамілі аб сваёй атацы на вайсковы аэрадром «Савасьлейка» у Ніжагародзкай вобласьці. У выніку яе, папярэдне, удалося зьнішчыць два вайсковыя самалёты — імаверна, МіГ-31 та Су-30/34.
Расейскія войскі актывізавалі наступы на некалькіх кірунках
Пасьля адноснага зацішша на фронце, якое працягвалася некалькі месяцаў, расейскія войскі перашлі да актыўных наступальных дзеяньняў.
Калі зь лютага да красавіка расейская армія захоплівала ў сярэднім 170 квадратных мэтраў на месяц, то ў траўні тэмпы расейскага наступу павялічыліся больш, чым у два з паловай разы — да 457 квадратных кілямэтраў акупаванай тэрыторыі кожны месяц. Гэта, як паведаміла Ўкраінская служба Радыё Свабода, адпавядае паказьнікам канца 2024 году.
Пад канец траўня расейскі наступ яшчэ больш паскорыўся: толькі за апошні тыдзень месяца Ўзброеныя сілы Расеі захапілі 18 украінскіх населеных пунктаў і прыблізна 200 квадратных кілямэтраў.
Асноўным кірункам расейскага наступу застаецца Данецкая вобласьць. Апроч таго, расейская армія актывізавалася ў Сумскай вобласьці, дзе за некалькі месяцаў захапіла 9 памежных населеных пунктаў, і канцэнтруе сілы на мяжы з Харкаўскай вобласьцю.
Расейскія войскі таксама наблізіліся да адміністрацыйнай мяжы Днепрапятроўскай вобласьці і, паводле галоўнага камандуючага Узброенымі сіламі Ўкраіны Аляксандра Сырскага, актывізаваліся ў Запароскай вобласьці, дзе сытуацыя становіцца ўсё больш пагрозьлівай.
Дзьмітрый Мядзьведзеў, намесьнік старшыні Савету бясьпекі Расеі, які займаў пасаду прэзыдэнта РФ з 2008 па 2012 год, заявіў у сваім Telegram-канале аб пачатку наступу расейскіх войскаў у Днепрапятроўскай вобласьці. Аднак у Генэральным штабе Ўзброеных сіл Украіны гэтую інфармацыю зьняпраўдзілі.
Паветраную трывогу ўначы абвяшчалі ўва ўсіх вобласьцях Украіны праз пагрозу ад расейскіх ударных дронаў і ракет. Польшча рэгулярна падымае ў паветра свае самалёты, калі Расея абстрэльвае заходнія рэгіёны Ўкраіны.
Расейскія войскі рэгулярна абстрэльваюць Украіну з розных відаў узбраеньня — ударнымі дронамі, ракетамі, кіраванымі авіябомбамі.
Кіраўніцтва Расеі зьняпраўджвае тое, што расейская армія наносіць мэтанакіраваныя ўдары па цывільнай інфраструктуры і мірным насельніцтве.
Украінская ўлада і міжнародныя арганізацыі кваліфікуюць гэтыя ўдары як ваенныя злачынствы Расейскай Фэдэрацыі і пераконваюць, што яны маюць мэтанакіраваны характар.
ГЛЯДЗІЦЕ ТАКСАМА: «Мамін абутак. Я дарос — і цяпер ён мой». Гісторыя Рамана, які выжыў падчас расейскага ўдару па Віньніцы, а ягоная мама загінулаВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.